يوميات واحد متضايق

هذا الموضوع يحتوي على 0 ردود و 0 مشاركون وتمّ تحديثه آخر مرة بواسطة  مجهول قبل 6 سنوات، 3 شهور.

  • الكاتب
    المشاركات
  • #93649

    مجهول

    السلام عليكم ورحمة الله وبركاته
    يوميات واحد متضايق
    اليوميات دى من تأليفى وغير منقولة وبإذن الله لو لقت قبول وإعجاب من حضراتكم هاتكون بشكل حلقات متتابعة ،، كل فتره هانزل فقرة J
    بسم الله بندأ
    الصبح بدرى يصحى يوسف على صوت ابنه بيزعق فى ودنه وينهض من الفراش ويمسك ابنه فى عصبية ويبتسم ابنه قائلا :
    صباح الخير يا بابا يالا بقى الساعة بقت 12
    ينظر إلى المنبه بسرعة فيجد الساعة 7صباحا فيقول لإبنه
    انتا هاتشتغلنى يالا ؟ إيه اللى مصحيك بدرى كدة الساعه لسة 7
    -بصراحة ماما قالت لى اقول لك كدة علشان انتا كل يوم بتغلبها ومبتصحاش بدرى
    – يا راااجل ،، تعالا هنا .. هى اللى قالت لك كدة ؟
    -آآه وبتقول كمان انك كنت صاحى للساعة 3الفجر .. وقالت انها كل يوم بتزهق منك علشان انتا بتزعق لما بتلاقيها لسة بتعمل الفطار وبتيجى من الشغل متضايق وبتزعق من غير سبب و..
    – الا قول لى يا عمرِ ،، انتا يابنى شكلك بتحبها أوووى
    -طبعا .. مش ماما ؟
    يخرجان معا وينظر يوسف إلى زوجته وفى عينه نظرة لا ترتاح لها فتنظر إلى عمر قائلة بصوت منخفض
    -انتا قلت له إيييييه ..
    -مفيش يا ماما قلت له يالا علشان ماما عملت الفطار
    -إنتا ؟؟ ماشى
    يوسف : أومال أحمد فين
    الأم: هه ؟
    -هه إيه ؟ أحمد فين
    عمر: أحمد يا بابا لسة مجاش من إمبارح وخد من ماما 200جنيه وقافل موبايله
    تنظر الأم إلى عمر بعصبية وتخبط رأسه قائلة : اكتم خالص مش عايزة أسمع صوتك ..
    يوسف: يعنى إبنك بات برة البيت يا أستاذه ؟ راح فين البشمهندس اتكلمى
    تنظر إليه مبتسمة وتقول
    -يالا نفطر ونبقى نحكى بعدين ،، لما تودى عمر المدرسة
    يقول له عمر بصوت منخفض: اوعى تسمع كلامها ،، بتثبتك
    -انتا متأكد يابنى إنك فى تانية أبتدائى ؟؟ شكلك يدى على مخبر سرى
    فى هذه الأثناء يدخل أحمد ويتجه إليهم
    السلام عـ ..
    وقبل ما يكمل يلاقى يوسف ماسك فيه ويسأله فى عصبية
    -كنت فين ياض
    عمر: كان مع الشلة اياها يا بابا هايكون فين يعنى .. أقول لك .. ابنك ضاع ولازم تلحقه
    أحمد آخر ما زهق مسك أخوه من التيشيرت ورفعه وقال له بعصيبة
    انتا عايز إيه منى يابنى .. انتا عايز الحج يمضى على وشى ؟
    يشير عمر إلى شقيقه فيقترب منه
    عمر : (بصوت منخفض) تاخد الكمبيوتر الغبى بتاعى وتدينى اللاب توب ..
    أحمد: كل اللى انتا عايزه يا برنس بس الحقنى من بابا لحسن ده شكله عايز يجرب فيا الكاراتيه اللى كان بيلعبه
    عمر: وتجيب لى خمسيناية من الـ 200 جنيه اللى قلبت ماما فيهم
    أحمد: ده يوم ما الزمالك يكسب الأهلى 4-0 برضو مش ..
    تعرف يا بابا إن أحمد امبارح خد منك علبة السجاير وراح خمس فيها مع ..
    انتا خدت منى علبة السجاير امبارح ياض؟
    هه !!
    عمر: يا جماااااااااعة أنا تعبت معاكم .. مش كل دقيقة هافضل أهدى النفوووس

    يخرج يوسف من البيت بيضرب أخماس فى أسداس .. بدون فطار ومتأخر على الشغل
    فى الشغل يجد صديقه
    -ايه يابنى متأخر ليه .. المدير عايزك
    (فى مكتب المدير)
    -صباح الخير يا فندم
    ينظر إليه باحتقار
    -أهو صباح .. تأخير ساعة و نص يا أفندى
    -متأسف يا فندم ،، ظرف طا..
    -أنا ماليش دعوة بالكلام ده .. انا اللى ليا الإلتزام بالمواعيد ،، خصم 10أيام .. أتفضل
    -يا فندم ..
    -اتفضل على مكتبك

    يخرج من المكتب بيكلم نفسه فيجده صديقه
    -مالك يابنى
    -قول لى يا محمود ،، موظف شركة متعين من 20سنة يتقال له يا أفندى؟
    -قال لك يا أفندى بس؟
    -وخصم منى 10 أيام
    – ياراجل ؟ و أفندى دى بس اللى مضايقاك.. أنا ممكن أتشتم بأسامى الحيوانات كلها ومحدش ييجى ناحية جنيه من مرتبى ..
    فى هذه الأثناء يتصل أحد به .. وبمجرد أن يرد يسمع خبر يصيبه بالفزع
    -إيه ؟! طب أنا جاى حالا .. سلام
    صديقه: يوسف .. طب والمدير .. هاتعمل معاه إيه

    ايه ده .. ياترى هو سمع إيه غيره أوووى كدة
    بإذن الله هاكمل الفقرة قريب إذا نال الموضوع إعجابكم

    Habiba

يجب تسجيل الدخول للرد على هذا الموضوع.