بنصوم رمضان ليه؟

بنصوم رمضان ليه؟

س: بقول لابني اننا بنصوم رمضان علشان نحس بالفقراء اللي مش لاقيين ياكلوا… أعمل ايه وأقول له ايه تاني على رمضان؟

ج: للأسف المفهوم ده اتغرز فينا من زمان وفي رأيي هو بجد بيظلم رمضان… و الأطفال بتكبر وتكتشف ان الفقراء اللي بنتكلم عليهم دول بيصوموا برده رمضان… و هنا بنلاقي نفسنا في ورطة ومش عارفين نرد.

أنا مش هدخل في المنظور الديني  لكن هشارككم تأملاتي التربوية في هذا الشهر:

أولا: نقول لأولادنا ده الشهر اللي نزل فيه القرآن على سيدنا محمد وعلشان كده هو شهر بتختلف مكانته عندنا دونا عن باقي الشهور.
ثانيا: الشهر ده بيبن لنا قد ايه احنا أقوياء ونقدر نتغلب على حاجات مكناش فاكرين اننا نقدر عليها… يعني مثلا ممكن نكون جعانين وقدامنا أكل وحلويات… لكن عندنا قوة إرادة تخلينا نتغلب على رغبتنا فى الأكل… و ده معناه اننا حقيقي عندنا القدرة في التحكم فى نفسنا.
ثالثا: صوموا تصحوا… الصيام عامل زي الديتوكس… نظام بينضف الجسم كله ويعمله صيانة… ده غير انه بيريح جهازنا الهضمي وبالتالي بيحافظ عليه.
رابعا: الشهر ده فيه روحانيات جميلة وعلشان كله بركة وعطاء وعفو من الله، كل حاجة حوالينا بتشجعنا احنا كمان على العطاء و التسامح وبنحس عايزين ندى أكتر ونسعي أكتر في العبادة ونشكر ربنا على كل حاجة اداهالنا ونقدرها ونحافظ عليها.

ياريت نزين بيوتنا في الشهر ده ونحسسهم اننا في احتفال طول الشهر… ياريت نعمل معاهم نشاطات تعلمهم معلومات جديدة في دينهم كل يوم… ممكن نحكي لهم قصص أنبياء أو نقرأ معاهم قصص بتعلم سلوكيات سليمة… أو نذكر لهم معلومات جديدة عن طريق ألعاب و تلوين… وياريت نشجعهم على الصيام من العصر للمغرب علشان يحسوا معانا بفرحة النصر على نفسنا وقت المغرب ونقعد نستمتع مع بعض بالافطار كعيلة.

الأهم بقى من نقولهم ايه على رمضان، هو اننا نوريهم احنا عايشين رمضان ازاي!!!!
يعني ماينفعش أقول الكلام ده وانا طول الوقت قاعدة بزعق وبتعصب وبشتم وأقول معلش أصلي صايمة!!!!
ماينفعش أقول الكلام ده وانا قاعدة طول اليوم على المسلسلات!!!!
ماينفعش أقول الكلام ده وانا مقاطعة جيراني وبكشر في وشهم لو شافوني وأتجاهلهم!!!!!
الأهم من أقول لأولادي ايه، أوري أولادي انا عايشة رمضان ازاي؟
ولو أولادك صغيرين أرجوكي ماتسيبيهمش يتفلقوا من العياط علشان تصلي تروايح ساعتين وتقولي انا كده مثل أعلى ليهم!!!!! ده الرسول كان أحفاده بيتشعلقوا في ضهره وهو ساجد و بيسيبهم!!! خديهم في حضنك وانتي بتقرأي القرآن و ابتسميلهم و سمعيهم جماله في ترتيلك… صلوا مع بعض… صلى التراويح لما يناموا لو تقدري… مش عايزين أولادنا يحسوا ان ده شهر الهجر ليهم ولا انا سايباهم وبتعبد بس ولا انا سايباهم وقاعدة في المطبخ ومع المسلسلات طول اليوم.

%d مدونون معجبون بهذه: