ديوان المسحراتى لعمر الصاوى الخضرى

ديوان المسحراتى لعمر الصاوى

بائع الخضار والبضاعة الصينية

الخضرى
مسحراتى فى البلد سرّيح
وصوتى طاير فوق جناح الريح

تسبق خطايا دعوتى وندايا
“يا رب بلّغ مصر كل الغايه”
والليل معايا يقول: آمين يا رب

سرّيح وكل القاهره دارى
أجُرّ غيط جرجير علي حمارى
والباميه جارى ماشيه تتقمع

يا بو العُرُوش يا جزر
باحب من غير حذر
وقلبى شاف ما لا يَشُوف النظر

رميت بعينى من هنا لهناك
لقيت (قمر) من ضرفة الشباك
مايل عليا بضحكته.. والسَّبَت
يقول: كرمبه وحزمتين شَبَت

يا ليله ناديه ويا نجوم رِقّه
حمّلت قلبى خضار على العربيه
نزل القمر نقى
باميه ولمون وخيار وقتّه وخس
وفاصوليا وبسله وسَلْق وكرفس
والخير بيتنقّل ما بين الإيدين
وانا خضارى من الغيطان متوصّى
على الحبايب والنقاوه الزين

يا وعد قلبى فى ليله موعوده
زعلت بتنجانه قالوا لْها يا سوده
وانا باهادى بالعَروس الابيض
كله على الله واللى فات يتعوض

نازل أنادى واقول يا أهل الحى
بين العشا والفجر رايح جى
نعناع منعنع، قال ضميرى حى
دوّبت قلبى فى كبايات الشى
لجل الحبايب يشربوا ويتهنوا
ويسهّروا الضحك فوق السطح ويغنوا
والقمره بين النجوم متمخطره بشالها
لفت معايا القاهره بحالها..
ملوخيه يتنادى على أكّالها:
اصحى يا نايم
رمضان كريم
%d مدونون معجبون بهذه: