كوكيز الكريز بالمكسرات

أجمل إحساس ممكن تحسيه لما يدخل جوزك المطبخ مبهور بريحة المخبوزات الحلوة ، و الأجمل من كده لما تقدميله الطبق و تظهري شطارتك قدامه ، علشان عايزينك تعيشي اللحظات الحلوة ده بنقدملك كوكيز الكريز بالمكسرات و قبل ما تقولي الكريز و المكسرات غاليين ، إحنا عارفين إننا كلنا ستات بيوت موفرين و بنعرف نتصرف ، إيه رأيك لو بدلنا الكريز بالفراولة و المكسرات بالسوداني ( و عموما إحنا هنستعمل ½ فنجان بس من الكريز) و عيشي التجربة الحلوة ده معانا ، دلوقتي إستعدي علشان نبدأ الخطوات .

  •  جهزي المقادير

فنجان دقيق ، ½ فنجان زبدة ، ¾ فنجان سكر ، بيضة ، معلقة صغيرة فانيلا ، ¼ معلقة صغيرة بيكنج بودر 1 1/2 ، ¼ معلقة صغيرة ملح ، ½ فنجان كريز ، ½ فنجان مكسرات ، معلقة صغيرة بشر برتقال ، 2 معلقة لبن ، ½ فنجان سكر بني.

 إخلطي بعض المقادير

في طبق عميق إخلطي الزبدة و السكر الأبيض و البيضة و الفانيلا و قلبي كويس لحد ما يمتزجوا ببعض .

جهزي الدقيق

إخلطي الدقيق و البيكنج بودر و الملح مع بعض في طبق تاني .

  • ضيفي الخليط الأول مع التاني

ضيفي الدقيق للخليط الأول و إعجني كويس و سيبيهم في الثلاجة لمدة ساعة .

  • جهزي الحشو

في طبق صغير ضيفي الكريز المقطع و المكسرات المطحونة و بشر البرتقال .

  • إفردي العجينة

جهزي مكان تفردي عليه العجينة ( لوح تقطيع أو رخامة المطبخ ) و رشي عليه دقيق و إفردي العجينة عليه (بعد ما تخرجيها من التلاجة ) و خليها علي شكل مستطيل .

  • إستعدي بالحشو

في طبق صغير ضيفي السكر البني و اللبن و قلبي كويس و حطي الخليط علي العجينة و إفرديه عليها .

  • لفي العجينة

رشي فوق العجينة الكريز و المكسرات و بشر البرتقال ، و سيبي مسافة صغيرة من جميع الأطراف ، علشان الحشو ميقعش من العجينة و لفيها علي شكل رول .

  • حطي العجينة في الثلاجة

دلوقتي لفي العجينة اللي علي شكل رول بورق زبدة و سيبيها في الثلاجة عدة ساعات

  • قطعي العجينة

خرجي العجينة من الثلاجة و قطعيها حلقات

  • إخبزي العجينة

سخني الفرن لدرجة حرارة متوسطة و رصي حلقات العجينة في صينية مدهونة و حطيها في الفرن حوالي 15 دقيقة .

  • زيني و قدمي

خرجي الصينية من الفرن ، و رصي الكوكيز في طبق التقديم و زينيها بالكريز .

  • نصائــــح

زي أي مخبوزات الفرن لازم يكون سخن قبل ما تدخلي الصينية علشان متنشفش منك .
حاولي تسيبي فراغات و إنتي بترصي العجينة في الصينية ، علشان هتنفش بعد الخبز و ممكن تلزق في بعضها .
متزوديش فترة الخبز علشان ده هيساعد إن الكوكيز تنشف ، إختبري السوي بإنك تحطي إيديك عليها ، لأن الكوكيز ده مش هيكون لونها بني .
المقادير هتطلع عدد قليل من الكوكيز لو عاوزة ضاعفي المقادير حسب عدد الأفراد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *