كلام صاحبك ترجمه بالعكس

نتيجة بحث الصور عن كلام صاحبك

بيكلمك فى التليفون أو يشوفك فى الشارع تتفقوا على معاد أو تتكلموا فى موضوع مهم.. صاحبك ليه كلام كتير بتسمعه دايمًا منه.. ترجمته الحقيقية عكس اللي بيقوله خالص زي”خمس دقايق وأوصل” و”لسه فاكرك من يومين” و” والله كنت لسه هكلمك” عايز تعرف صحبك بيقولك الحقيقة ولا بيشتغلك..

إعرف معانا أكتر جمل بيقولهالك وهو يقصد عكسها..

” 5 دقايق وأوصل”

دايما يقولهالك وهو متأخر على معاده إللى اتفقتوا عليه من قبل كده، تكلمه فى التليفون يقولك خلاص أنا 5 دقايق وأوصل؛ وطبعا الدقايق ديه وحدة قياس زمنية معناها الحقيقى ساعة ونص وأكون عندك.. و فعًلا تستنى فى الشارع ساعة وأكتر لحد ما يجي.. فنصيحة أقعد على القهوة أو إتمشى شوية أول ما تسمع صاحبك بقولك “5 دقايق وأوصل”

“أنا فى الطريق خلاص”

أعرف إن صاحبك لسه هيقوم يلبس وطبعا لو نضيف هياخد دش الأول وبعدها يلبس ويحط جل فى شعره وينزل من بيته ويركب يعنى بتتكلم فى حوالى ساعتين عشان يجيلك أصلا.. فيستحسن إنك تخلص مشواريك كلها وتخليه مقابلته أخر حاجة ممكن تعملها.

“كنت لسه هكلمك”

طبعا ديه بتتقال أول ما تكلمه فى التليفون قبل ما يقولك “صباح الخير أو السلام عليكم” تلاقى الجملة ديه اتقالت بسرعة الصاروخ ولازم يعلى فيها صوته عشان تتأكد إن كلامه صح.. طبعا ترجمتها الحقيقة إنه كان ناسيك خالص وأول ما شاف اسمك على التليفون افتكرك. في حالات تانية ممكن تكون الجملة يقصد بيها أنا مشغول ومش فاضى بس فاكرك وفاكر إنت عايز منى إيه “ديه فى حالة صحاب المصلحة” .. نصيحة ليك بلاش تقوله “والله بقى كنت هتكلمنى؟” لأنه هيقولك أه كنت لسه هكلمك فى نفس ذات اللحظة؛ أه وبلاش تسأله كنت هتكلمنى فى إيه عشان هيقولك بطمن عليك.

“كنت على بالى من يومين”

يعنى افتكرك عشان مصلحة أو ليه عندك فلوس، وفى الأغلب بتكون شفته بالصدفة فى الشارع أو الشغل؛ وجملته الأولى ليك أول ما يشوفك “كنت على بالى”.. بس السؤال هنا..إشمعنى كلهم بيقولوا يومين مينفعش يكون من اسبوع ولا حتى امبارح؟.. المهم إنها بتتقال.. أوعى بقى تسأله افتكرتينى ليه بقى من يومين لأنه بسرعة هيقولك على مصلحته منك إستنى عليه شوية هو هيقولك لوحده بعد ما يحسسك قد إيه إنت وحشه وهو مفتقدك.

“فينيك مش باين ليه”

أصلا هو بيكون مختفى وفى الأغلب بيكون فى شغل جديد أو حاجة حلوة بتحصل فى حياته ومختفى عن الدنيا كلها عشان ميقولش عليها لحد.. بس طبعا لازم يحسسك إنه هو موجود على طول و الناس كلها بتشوفه كل يوم إلا إنت إللى مختفى، وممكن كمان يقولك باقية الشلة بتسأل عنك لدرجة إنك ممكن تصدق فعلا إنك مختفى ومش موجود فى الدنيا أصلا.. نصيحة يعنى عشان ترتاح كبر دماغك منه ولما يقولك كده ريحه وقوله شوية مشاغل خليه يحس إنه حواره مش فارق معاك.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *