طريقة عمل الأرز بالمكسرات

الارز بالخلطة او بالمكسرات من الطرق المميزة لعمل الارز عشان طعمه مختلف عن الارز الابيض العادي او حتى الارز بالبصل، والارز بالمكسرات بيتقدم مع وجبات معينة زي الحمام او البط او المشاوي وبيكون حلو جدا مع الكبدة الاسكندراني او المشوية، واكيد كلنا بنحب التجديد والتنوع في تقديم الاطباق على السفرة خاصة الاطباق اللي بناكلها كل يوم زي الارز احنا هنا حنساعدك تجددي وجبنالك مقادير وخطوات و طريقة عمل الارز بالمكسرات بالتفصيل

مقادير و طريقة عمل الارز بالمكسرات

المقادير

  • كوبايتين ارز عادي

  • معلقتين سكر كبار ممسوحين

  • ملح وفلفل

  • كوبايتين ماية

  • معلقة صغيرة سمنة او زبدة

  • معلقتين كبار زبيب

  • معلقتين كبار لوز

خطوات التحضير

  • حطي الحلة اللي حتطبخي فيها الارز (يفضل ستنانلس او ايناميلد او سيراميك مش تيفال) على النار وسيبيها لما تنشف وتسخن

  • حطي معلقتين السكر وسيبيهم يسيحوا من غير اي دهون

  • حركي الحلة من بعيد من غير معلقة لغاية ما تختفي حبوب السكر خالص ويبقى لونه دهبي

  • قلبي السكر بالمعلقة الخشب لغاية ما يبقى لونه بني محمر وخلي بالك لو فاتح حيبقى الارز مسكر ولو غامق اكتر من اللزم حيبقى مر، لازم يكون زي الصورة

طريقة عمل الارز بالمكسراتخلي بالك من لون السكر

  • حطي الماية وخلي بالك من سخونية البخار على ايدك ووجهك

  • سيبيه يغلي وحطي الملح والفلفل والزبدة او السمنة

  • حطي معلقة كبيرة من الزبيب

  • لما تغلي الماية حطي فيها الارز وسيبيها تتشرب

  • غطي الارز وهدي النار بالطريقة المعتادة لعمل الارز

  • في حلة صغيرة او وعاء صغير حطي اللوز يغلي على النار زي الصورة

اغلي الوز في شوية مايةاغلي الوز في شوية ماية

  • وسيبيه يغلي دقيقة واحدة وبعدين خرجيه وبرديه وقشريه واقطعي كل واحدة على اتنين بالطول

  • في طاسة صغيرة حطي نص معلقة صغيرة زبدة وحمري اللوز المقشور المقطع مع معلقة الزبيب الثانية وممكن تضيفي شوية صغيرين بندق مقشور ومقطع وصنوبر، لما الزبيب يتنفخ والمكسرات يبقى لونها دهبي طفي النار

  • قدمي الارز في طبق التقديم وزينية بالمكسرات المحمرة

الارز بالمكسراتالارز بالمكسرات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *