تمارين لبطن مسطحة وانتي قعدة على الكرسي

 تمارين لبطن مسطحة تقدري تعمليهم وانتي قعدة على الكرسي

 

كتير مننا ممكن يكون بيقعد فترات طويلة قدام الكمبيوتر او في الشغل بنبقى مضطرين نقعد وقت طويل, والابحاث مؤخرا اثبتت ان القعدة فترات طويلة ممكن تضر بالصحة بشكل عام وان الاشخاص اللي بيقعدوا فترات طويلة ممكن يبقوا اكتر عرضة للاصابة بالسرطان, السكر, امراض القلب والاوعية الدموية, وزيادة الوزن وخصوصا في منطقة البطن, لكن الخبر الكويس انك ممكن تتفادي كل الحاجات دي وانتي قعدة في مكانك على الكرسي من خلال مجموعة تمارين لبطن مسطحة باستخدام الكرسي, والتمارين مش بس مفيدة للبطن لا كمان بتشتغل تقريبا على معظم عضلات الجسم يعني هتحسن شكل الجسم كله وصحتك بشكل عام وهتديكي طاقة اكتر لجسمك.

تمارين لبطن مسطحة باستخدام الكرسي:

1- التمرين الاول:

التمرين ده بيقوي عضلات البطن, بيحسن الهضم, وبيساعد على حرق الدهون.

– وانتي قعدة على الكرسي, حافظي على ضهرك مستقيم من غير ما تلمسي ضهر الكرسي او تسندي عليه.

– خلي القدمين على الارض وابعدي شوية بين الوركين متخليهمش لازقين في بعض.

– ارفعي ركبتك اليمين وانتي ضهرك مستقيم زي ما هو, واسحبي الركبة لمنطقة الصدر, وفي نفس الوقت تكوني شافطة بطنك لجوه اثناء الحركة.

– خليكي حاطة ايدك الاتنين على الركبة عشان تعملي سترتش افضل للعضلات اللي اسفل البطن.

– كرري التمرين من 20 – 30 مرة لكل ركبة.

تمارين لبطن مسطحة باستخدام الكرسيتمارين لبطن مسطحة باستخدام الكرسي

2- التمرين التاني:

التمرين ده مفيد جدا لكل عضلات البطن.

– اقعدي على الكرسي وضهرك مفرود.

– خلي الرجلين الاتنين لازقين في بعض, واسندي بايديكي الاتنين على ايدين الكرسي.

– مع الحفاظ على ضهرك مستقيم, ابدأي ارفعي رجليكي الاتنين وسحبهم للصدر, وعضلات البطن تكون مشدودة.

– بعدين نزلي رجلك لتحت من غير ما تلمسي الارض.

– كرري التمرين من 10 – 20 مرة.

تمارين لبطن مسطحة باستخدام الكرسيتمارين لبطن مسطحة باستخدام الكرسي

3- التمرين التالت:

التمرين ده بيحدد منطقة الوسط وبينحفها, وبيساعد على حرق الدهون من منطقة جوانب البطن.

– اقعدي على حرف الكرسي وضهرك مستقيم, واسندي بايديكي الاتنين على ايدين الكرسي.

– ميلي الجسم للجنب, يعني تبقي قعدة على جنب واحد بس من منطقة المؤخرة.

– خلي رجلك الاتنين لازقين في بعض, ارفعي الركبتين للصدر زي التمرين اللي فات.

– ارجعي للوضع الاول, وبعدين ميلي الجسم للجنب التاني واعملي نفس الحركة.

– كرري التمرين من 10 – 20 مرة لكل جنب.

تمارين لبطن مسطحة باستخدام الكرسيتمارين لبطن مسطحة باستخدام الكرسي

4- التمرين الرابع:

التمرين بيساعد على حرق الدهون من جوانب البطن, ومن منطقة الوركين.

– زي ما انتي على الكرسي, خلي رجلك على الارض.

– خلي الذراعين على مستوى كتفك.

– اتني الجزء اليمين اللي فوق من الجسم والمسي قدمك الشمال بايدك اليمين, وايدك التانية مفرودة لورا في نفس مستوي الكتف, خليكي على الوضع ده لمدة دقايق.

– ارجعي للوضع الاولاني, وبعدين انحني بالجنب الشمال والمسي القدم اليمين بايدك الشمال.

– كرري التمرين من 20 – 30 مرة لكل جنب.

تمارين لبطن مسطحة باستخدام الكرسيتمارين لبطن مسطحة باستخدام الكرسي

5- التمرين الخامس:

التمرين ده بيحرق الدهون بسرعة, بيشتغل على عضلات البطن والضهر والكتف.

– وانتي قعدة على الكرسي, امسكي ايدين الكرسي كويس بايديكي الاتنين.

– ارفعي جسمك من على الكرسي وخلي الوركين والساقين متعلقين في الهوا, وبعدين استخدمي عضلات البطن عشان ترفعي الركبتين لمنطقة الصدر وانتي بنفس الوضع.

– خليكي في الوضع ده لمدة من 15 – 20 ثانية على الاقل, وبعدها ارجعي ببطء للوضع الاولاني, وخدي استراحة بسيطة.

– وكرري التمرين 4 مرات.

تمارين لبطن مسطحة باستخدام الكرسيتمارين لبطن مسطحة باستخدام الكرسي

6- التمرين السادس:

التمرين ده مفيد جدا لمنطقة الوسط, وبيشتغل على عضلات البطن المائلة والسفلى.

– اقعدي على الكرسي وضهرك مستقيم, من غير ما تلمسي ضهر الكرسي, حطي ايدك ورا راسك.

 

– ارفعي ركبتك اليمين ناحية الصدر, وفي نفس الوقت اتني كوعك الشمال والمسي بيه ركبتك اليمين.

– ارجعي للوضع الاولاني, كرريه 15 مرة.

– اعملي الجنب التاني ارفعي ركبتك الشمال ناحية الصدر, وفي نفس الوقت اتني كوعك اليمين والمسي بيه ركبتك الشمال, كرريه 15 مرة.

– ممكن تحاولي تعملي 4 مجموعات لكل جنب يعني بعد ما تعملي الجنب 15 وتبدلي للجنب التاني ارجعي للجنب الاولاني تاني وهكذا 4 مرات.

تمارين لبطن مسطحة باستخدام الكرسيتمارين لبطن مسطحة باستخدام الكرسي

7- التمرين السابع:

التمرين ده كمان باستخدام الكرسي لكن وانتي واقفة, والتمرين بيساعد على تقوية وشد منطقة المؤخرة, وبيحرق دهون البطن والوسط.

– اقفي جنب الكرسي, اسندي بايدك الشمال على ايد الكرسي.

– ارفعي ايدك اليمين لفوق, وفي نفس الوقت ارفعي الرجل اليمين بحيث ان ايدك تلمس كعب رجلك.

– ارجعي للوضع الاولاني, وكرري التمرين من 10 – 15 مرة.

– غيري للايد والرجل التانية, وكرريه من 10 – 15 مرة.

– ممكن تعمليه في 4 مجموعات لكل جنب.

تمارين لبطن مسطحة باستخدام الكرسيتمارين لبطن مسطحة باستخدام الكرسي

وبننصح كل بنات حوا ينتظموا على التمارين دي بشكل يومي عشان يوصلوا لنتايج سريعة, وممكن توصلي لنتايج افضل كمان لو مشيتي مع التمارين على نظام غذائي صحي.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *